《回家》
結婚搬出去住都差唔多兩年，因為要裝修嘅關係，最近我搬咗返屋企住，同時可以陪吓屋企人。
訓返已經訓咗十幾年嘅床，望住一個熟悉嘅窗景，呢個景，由我中學時開始陪伴著我，到大學，到工作，到結婚，感覺好似無變過咁。
返去住之後，每晚六點零鐘，爸媽都會問我幾點返去食飯，而返到去，都總會有一煲湯係度等我，
自從結婚搬咗出去住之後，幾乎就無乜點飲過湯水，買肉買蔬果再用幾個鐘去煲，對於上班族講真係一件唔小嘅事，近乎係大工程，要隆重其事；最近搬返去同爸爸媽媽住一排，每日都有一煲湯等住自己，飲嘅時候不其然咁覺得，原來自己曾經每日都有湯飲。
湯係一種好神奇嘅迷思，每個阿媽都鍾意煲湯，覺得係一樣好健康嘅飲品，而每個阿媽都有幾種拿手好湯，係特別好飲嘅，同時亦有一批你飲都唔想飲但迫住要飲嘅湯，我飲過水魚湯、田鼠湯、藥材湯，因為呢個原因，我對湯一直都好偏向西湯，起碼無伏先。
飯菜放好，碗筷放好，幾乎返到去就可以直接食，諗返起搬出去住就算自己煮都需要搞一大餐，食完仲要洗，仲要洗衫晾衫，依家我好似去咗一個天堂咁，咩都唔駛自己做，咩都有人關心有人幫手，訓上床時都仲係好早，早到唔知有乜好做咁。
坦白講，我唔算一個痴家嘅人，可以出國就出國，可以約朋友就約朋友，可以自己一個就一個，而搬出去住之後，真係感到好自由無人理咁滯，但附帶就係，所有事都要自己做，而當我已經習慣自己做時，回家呢幾日，我先感覺到原來自己係咁幸福。
所有家務都好，其實都唔難做，有邊個唔識做，但每日都做，不問不求任何回報，甚至你做錯咩都唔會點鬧你嘅，我諗，真係只有父母先會咁好。
我好慶幸可以有一次咁嘅機會，再次回家，就好似返去少年時代咁，享受住不平等嘅待遇。
仲記得搬走前，我係床上面望住一切，覺得好不捨，唔知自己會唔會習慣，但係再次訓返係同一個位置，有一種既熟悉又陌生嘅感覺，一切都好唔真實，好似發緊夢咁。
當你累了，永遠都有一個避風港歡迎你，回家真好。
Search